नेपाल उद्योग वाणिज्य महासंघ र अमेरिका स्थित वर्ल्ड ट्रेड सेन्टर एसोसिएसन (World Trade Centre Association), नेपाल र अमेरिका बीच आर्थिक व्यावसायिक सम्बन्ध विस्तारका लागि सहमत भएका छन् । आपसी आर्थिक एवं व्यावसायिक सम्बन्ध विस्तार गर्ने उद्देश्य सहित दुवै संस्था बीच यही पौष २८ गते अमेरिकाको न्यूयोर्कमा एक सहमतीपत्र (MoU) मा हस्ताक्षर भएको छ । सहमतीपत्रमा महासंघका तर्फबाट अध्यक्ष कुशकुमार जोशीले हस्ताक्षर गर्नुभयो ।
सहमती अनुसार दुवै संस्थाले आगामी दिनमा सहकार्यका सम्भाव्य क्षेत्रको पहिचान सहित लगानी तथा व्यवसाय विस्तारका दिशामा सहकार्य गर्ने छन् । यसका लागि सूचना तथा तथ्यांकको आदान प्रदान, व्यवसायिक भ्रमण, मेला महोत्सवको एकअर्का देशमा आयोजना गर्ने लगायत उल्लेख गरिएको छ । साथै सहमतीपत्रमा अमेरिकामा नेपाली वस्तुहरुको निर्यात सम्भाव्यता एवं वस्तु पहिचानमा पनि सहकार्य गर्ने उल्लेख छ । सहमतीपत्रमा हस्ताक्षर पश्चात कार्यक्रमलाई सम्वोधन गर्नुहुदै महासंघका अध्यक्ष जोशीले एमओयू दुई देश बीच निजीस्तरबाट आर्थिक व्यवसायिक सम्बन्ध विस्तारका लागि एक महत्वपूर्ण माध्यम हुने विश्वास प्रकट गर्नुभयो ।
त्यसअघि पौष २६ गते सोमवार महासंघको प्रतिनिधिमण्डल र अमेरिकी व्यापार विभागका पदाधिकारीहरु बीच रोनाल्ड रेगन भवनमा दुई पक्षीय वार्ता सम्पन्न भयो । अमेरिकाका लागि नेपाली राजदुत डा. शंकरप्रसाद शर्माको समुपस्थितिमा भएको वार्तामा अमेरिकी व्यापार विभागका पदाधिकारी, अमेरिकास्थित वर्ल्ड ट्रेड सेन्टर एसोसिएसनका अध्यक्ष जोन डिकसन (John Dickson, President, World Trade Centre Association), एनआरएन-आइसीसी अमेरिकाका सदस्य राजेन्द्र बहादुर श्रेष्ठ र नेपालसंग व्यावसायिक सम्बन्ध भएका अमेरिकी व्यावसायिक समुदायको सहभागिता रहेको थियो ।
वार्तामा नेपालको निजी क्षेत्रबाट दुई देश बीचको आर्थिक एवं व्यापारिक सम्बन्ध विस्तारको लागि भएको प्रयासको सराहना गरियो । सो अवसरमा नेपाली राजदुत डा. शर्माले आगामी अप्रिलको अन्तिममा अमेरिकामा द्विपक्षीय व्यावसायिक सम्बन्ध विस्तारका लागि केही कार्यक्रमहरु गर्ने तयारी भइरहेकोले उक्त कार्यक्रमलाई सफल पार्न महासंघबाट सहयोगका लागि आग्रह गर्नु भयो ।
साथै भेटवार्ताका अवसरमा अमेरिकी पदाधिकारीहरुले नेपाल व्यापार रणनीति २०१० (Nepal Trade Integration Strategy-NTIS-2010) अन्तरगत पहिचान गरिएका प्रमुख निर्यातयोग्य वस्तुहरुको प्रतिनिधित्व हुने गरि छिट्टै नेपालबाट अर्को व्यवसायिक भ्रमणका लागि आग्रह गर्नुभयो । एनटीआइएस-२०१० अन्तरगत औद्योगिक उत्पादन र कृषि उत्पादन गरि जम्मा १९ वटा वस्तु तथा सेवाहरु प्रमुख निर्यातयोग्य वस्तुका रुपमा सूचीकृत गरिएको छ ।
भ्रमणका क्रममा महासंघको प्रतिनिधिमण्डलले अमेरिकाको वालटिमोरमा प्रि्रन्टिङ, प्याकेजिङ, काठजन्य उद्योगहरुको निरीक्षण समेत गरेको थियो । त्यसैगरि भ्रमणका क्रममा प्रतिनिधिमण्डलले नेपाली राजदुतावासमा नेपाली राजदुत डा. शंकरप्रसाद शर्मासग भेटगरि नेपाल अमेरिका बीचको आर्थिक व्यावसायिक सम्बन्ध विस्तार सम्भाव्यता विषयमा छलफल गर्žयो ।
स्मरणीय छ-नेपाल अमेरिका बीचको आर्थिक व्यवसायिक एवं लगानी विस्तारको सम्भाव्यता अध्ययन गर्ने उद्देश्यले महासंघ र अमेरिकास्थित नेपाली राजदुतावासको आयोजना तथा एनआरएन अमेरिकाको व्यवस्थापनमा महासंघका अध्यक्ष कुशकुमार जोशीको नेतृत्वमा महासंघको छ सदस्यीय प्रतिनिधिमण्डल साताव्यापी भ्रमणका क्रममा अहिले अमेरिकामा रहेको छ । भ्रमणदलका सदस्यहरुमा महासंघको कार्यकारिणी समितिका सदस्यहरु गुणनिधि तिवारी र अम्मरराज आचार्य, महासंघको सदस्य वाग्लुङ उवासंघका अध्यक्ष वसन्तकुमार श्रेष्ठ र वुटवल उवासंघका अध्यक्ष शंकर श्रेष्ठ तथा महासंघका उपनिर्देशक रतिश बस्न्यात हुनुहुन्छ । पौष २४ देखि प्रारम्भ भएको महासंघको अमेरिकाको व्यावसायिक भ्रमण टोली भोली स्वदेश र्फकने कार्यक्रम छ ।
थप फोटोको लागि कृपया यहाँ क्लिक गर्नु होला ।
