रसुवा, नुवाकोट बाढी प्रभावितका लागि आयुर्वेदिक औषधी उत्पादक संघद्वारा रु.४ लाख ५० हजार सहयोग (२०८३/०५/३१)

 
रसुवा जिल्लाका बाढी प्रभावितको राहत तथा पुनःस्थापनाका लागि नेपाल आयुर्वेदिक औषधी उत्पादक संघले नेपाल उद्योग वाणिज्य महासंघमार्फत ४ लाख ५० हजार रुपैयाँ सहयोग गरेको छ । सहयोग रकम बराबरको चेक नेपाल आयुर्वेदिक उत्पादक संघका अध्यक्ष बुद्धिमान शाक्यले नेपाल उद्योग वाणिज्य महासंघका वस्तुगत उपाध्यक्ष नरेशलाल श्रेष्ठलाई हस्तान्तरण गर्नुभएको हो ।

महासंघका वस्तुगत उपाध्यक्ष नरेशलाल श्रेष्ठले रसुवा बाढी प्रभावितका लागि संघद्वारा प्राप्त सहयोगले राहत तथा पुनःस्थापनामा महत्वपूर्ण योगदान पुग्ने बताउँदै सहयोगका लागि नेपाल आयुर्वेदिक उत्पादक संघप्रति आभार व्यक्त गर्नुभयो ।

चेक हस्तान्तरण गर्दै संघका अध्यक्ष शाक्यले प्राकृतिक विपद्मा प्रभावित नागरिक तथा व्यवसायीको राहतका लागि निजी क्षेत्रले आफ्नो सामाजिक उत्तरदायित्व अन्तर्गत निरन्तर सहयोग गर्दै आइरहको बताउनुभयो ।

महासंघले बाढी तथा पहिरोबाट प्रभावित क्षेत्रका उद्योगी–व्यवसायी तथा सर्वसाधारणलाई राहत र पुनःस्थापनामा सहयोग पुर्याउन विभिन्न संघसंस्था तथा निजी क्षेत्रसँग सहकार्य गर्दै आएको छ ।